ಪಂರ್ದ್ ಪೆಲಕಾಯಿ

ಪಂರ್ದ್ ಪೆಲಕಾಯಿದ ಬಗ್ಗೆ....

ಕಲ್ಲಿಗೆ 
ಬುಲೆದ್
ಪೆಲಕಾಯಿ
ಪಂರ್ದ್‍ನಡೆಮುಟ್ಟ...

ಎನ್ನ ಮಡೀರ ತುಳು ಕಬಿತೆದ ಗೊಂಚಿಲ್ ಪಂರ್ದ್ ಪೆಲಕಾಯಿ. ಎನ್ನ ವಕಾಲತ್ತೆದ ಪುರ್ಸೊತ್ತು  ಇಜ್ಜಂದಿನಾತ್  ಬೇಲೆದ ನಡುಟುಲಾ ಅಪಗಪಗ ಸಾಹಿತ್ಯದ ಬೇಲೆನ್ ಮೋಕೆಡ್ ಮಲ್ತೊಂದೇ ಇತ್ತೆ. ಇಂದೆಟ್ಟ್ ಕೆಲವು  ಕಬಿತೆಲು  ಆಲ್ಬಮ್‍ಗ್ ಬೊಕ್ಕ ಪಿಚ್ಚರ್‍ಗ್ ಬರೆಯಿನವು. ಬೊಕ್ಕ ಬಾಕಿದ ಉಲಯಿ ಒರಿಯರಾವಂದೆ ಪಿದಯಿ ರಾದ್ ಬೈದಿನವು.

ಪಂರ್ದ್ ಪೆಲಕಾಯಿಡ್ ನಾಲ್ ಬಗೆತ ಕಬಿತೆಲ್ನ ಪಾಲ್ ಮಲ್ತ್‍ದೆ. ಪತ್ತ್‍ಂಡ ಆತ್ ಸುಲಬೊಡು ಬುಡ್ಪಾಯೆರೆ ಆವಂದಿನ ಮಯಣದ ಲೆಕ್ಕ, ಒರ ಓದ್‍ದ್ ಮನಸ್‍ಗ್ ತಾಗ್‍ಂಡ ಪಕ್ಕೊಗು ಪಿದಯಿ ಬರಿಯೆರೆ ಆವಂದಿನ ಬೇನೆ ಬೆಸರ್‍ದ, ಪಿಸ್‍ರ್‍ದ ದುಂಬರಿಪುದ ಕಬಿತೆಲು ಮಯಣಡ್ ಇತ್ತ್‍ಂಡ, ತುಳು ಬಾಸೆ, ತುಳು ಪರ್ಬ ಗೌಜಿದ ಬಗ್ಗೆ ಬರೆತಿನ ಕಬಿತೆಲೆನ್ ಗೂಂಜಿ, ಪೆಲತ್ತರಿ ಪನ್ಪಿನ ಇಡೆ ಬರವುದಡಿಟ್ ದೀತೆ. ಕೆಲವು ಪೊಸ ದೇಕಿದ, ರಿವಾಜ್ ಮೀರ್‍ದಿನ ಕಬಿತೆಲೆನ್ ರೆಚ್ಚಿಡ್, ಅಂಚನೆ ಮೋಕೆ-ಸೂಕೆದ ಪದೊಕುಲೆನ್ ಪಚ್ಚಿರ್‍ದ ಚೀಪೆಡ್ ಮುರ್ಕಾದೆ. ಸಾವಕಾಸೊಡು ಕೈಕೊನೊ ಡೂಂದು ಕೇನೊನುವೆ.

ಎಕ್ಕ ಸಕ್ಕ ಆದಿತ್ತಿನ ಎನ್ನ ಕಬಿತೆಲೆನ್ ಒಟ್ಟು ಕೂಡ್ಸಾದ್ ತಿದ್ದ್‍ದ್ ಕೊರ್ದು ಮುನ್ನುಡಿ ಬರೆದ್ ಕೊರ್ಲೇಂದ್ ಹಿರಿಯ ಜಾನಪದ ವಿದ್ವಾಂಸೆರಾಯಿನ ಡಾ. ಬಿ.ಎ. ವಿವೇಕ ರೈಕುಲೆಡ ಕೇಂಡ್‍ದಿತ್ತೆ. ಆರ್ ಸಾವಕಾಸೊಡು ಅವೆನ್ ತಿದ್ದ್‍ದ್, ಕೆಲವೊಂಜಿ ಸಲಹೆ ಕೊರ್ದು ಮಸ್ತ್ ಆತ್ಮೀಯತೆಡ್ ಎನ್ನ ಬೆರಿ ಬೊಟ್ಟುದು ಪರದೇಸೊಗು ಪಿದಾಡುನ ಗಡಿಬಿಡಿತ ನಡುಟುಲಾ ಪೊರ್ಲುದ ಮುನ್ನುಡಿ ಬರೆದ್ ಕೊರ್ತೆರ್.  ಅರೆಗ್  ಏತ್  ಸೊಲ್ಮೆ ಸಂದಾಂಡಲಾ ಅವು ಕಮ್ಮಿಯೇ. 
ಎನ್ನ ಸಾಹಿತ್ಯದ ಬುಳೆಚಿಲ್‍ಗ್ ಏಪಲಾ ಕೈಯೇರ್ದ್ ಆಶೀರ್ವಾದ ಮಲ್ಪುನ ಎನ್ನ ಅಮ್ಮೆರ್ ಶ್ರೀ ರತ್ನಾಕರ ರಾವ್ ಕಾವೂರು, ಅಮ್ಮ ಶ್ರೀಮತಿ ಜಯಂತಿ ರಾವ್ ಕೆ., ಎನ್ನ ಕೈಪತ್ತಿನ ಮಯೂರಿ, ಮೋಕೆದ ಮಗಲ್ ಶರಧಿ ಮಾತೆರೆನ್‍ಲಾ ಅರ್ತಿಡ್ ನೆನೆಪುವೆ.

ಪ್ರತಿ ಕಬಿತೆನ್‍ಲಾ ಓದ್‍ದ್, ಅರ್ಥ ಮಲ್ತೊಂದು, ಐತ ಭಾವನೆಲೆಗ್ ಸರಿಯಾದ್ ಚಿತ್ರ ಬುಡ್ಪಾಯಿನ ಎನ್ನ ಆತ್ಮೀಯ ಮಿತ್ರೆ ಶ್ರೀ ಪ್ರೇಮ್‍ನಾಥ್ ಮರ್ಣೆ ಇಂಬೆರೆನ್ ಮೋಕೆಡ್ ನೆನೆಪುವೆ.

ಪೊರ್ಲಕಂಟ್‍ದ ಅಚ್ಚಿಗ್ ಪುದರ್ ಪೊಯಿನ ಆಕೃತಿ ಪ್ರಿಂಟ್ಸ್‍ದ ಶ್ರೀ ಕಲ್ಲೂರು ನಾಗೇಶೆರೆಗ್ ಬೊಕ್ಕ ಮಾತ ಸಿಬ್ಬಂದಿ ವರ್ಗೊಗು, ಈ ಬೂಕುನುಲಾ ಪೊರ್ಲುಡೇ ಅಚ್ಚಿದಿಲ್ಲಡೆ ಕಡಪುಡುದು ಪೊರ್ಲು ಮಲ್ತಿನೆಕ್ಕ್ ಎನ್ನ ಸೊಲ್ಮೆ ಸಂದುಂಡು.
ಈ ಬೂಕುದ ಪ್ರಕಟಣೆದ ಜವಾಬ್ದಾರಿನ್ ದೆತೊನುನ ಒಟ್ಟಿಗೆ ಎನ್ನ ಸಾಹಿತ್ಯದ ಬೇಲೆಗ್ ಶಬಾಸ್‍ಗಿರಿ ಕೊರೊಂದುಪ್ಪುನ ರಂಗಸಂಗಾತಿ (ರಿ.) ಬಳಗದ ಮಾತಾ ದೋಸ್ತನಕ್ಲೆಗ್ ಎನ್ನ ಉಡಲ್‍ದ ಸೊಲ್ಮೆ.
ಈ ಬೂಕು ಬುಡುಗಡೆತ ಲೇಸ್‍ಡ್ ಪಾಲ್ ದೆತೊಂದು ಎಡ್ಡೆಪ್ಪುದ ಮದಿಪು ಕೊರ್ನ ಎನ್ನ ಆತ್ಮೀಯೆರಾಯಿನ ಡಾ. ಬಿ.ಎ. ವಿವೇಕ ರೈ, ಡಾ. ಎಂ. ಮೋಹನ ಆಳ್ವೆರ್, ಡಾ. ನಾ. ಮೊಗಸಾಲೆ, ಡಾ. ವಾಮನ ನಂದಾವರ, ಲ| ಕಿಶೋರ್ ಡಿ. ಶೆಟ್ಟಿ,  ಶ್ರೀ ರತ್ನಾಕರ ರಾವ್ ಕಾವೂರು, ಶ್ರೀ ಗೋಪಾಲ್ ಶೆಟ್ಟಿ ಮೊಕುಲೆಗ್‍ಲಾ ಎನ್ನ ತರೆ ತಗ್ಗಾವೊಂದು ಬೂಕು ಓದುನ ತುಳು ಬಂದುಲೆಗ್‍ಲಾ ಸೊಲ್ಮೆ ಸಂದಾವೊಂದುಲ್ಲೆ.

- ಶಶಿರಾಜ್ ರಾವ್ ಕಾವೂರ್

ಮುನ್ನುಡಿ - ಪ್ರೊ.ಬಿ.ಎ.ವಿವೇಕ್ ರೈ

ಪಂರ್ದ್ ಪೆಲಕಾಯಿ - ಸಾದಿದ ಬೊಲ್ಪು

ಸಾದಿದ ಬೊಲ್ಪು

ಪೊರ್ಲುದ ಪುತ್ತೊಳಿ ಈ ಅತ್ತಯಾ? | ನಿನ್ನ |
ಪೊರ್ಲವು ಎಂಕ್‍ಂದೆ ಪಂಡತ್ತಯಾ ?

ಸಾರ ಬೊಳ್ಳಿಲೆ ನಡುಟು | ಬಾನೊದ ಕಡೆಕೊಡಿಟ್
ಮೆನ್ಕು ತಿಂಗೊಲು ಪಲ್ಲೆ ಈ ಅತ್ತಯಾ  ? | ಪೊಣ್ಣೆ |
ಎನ ಸಾದಿಗ್ ಅವ್ವೆ ಬೊಲ್ಪತ್ತಯಾ ? || ಪೊರ್ಲುದ ||

ಕಾರಕಜಿಪುದ ನಡುಟು ಚೀಪೆ ಹೋಳಿಗೆಯಾದ್
ಬದ್‍ಕ್‍ದೊನಸ್‍ನ್ ಗಡ್‍ದ್ ಮಲ್ತತ್ತಯಾ? |ಪೊಣ್ಣೆ |
ಕಮ್ಮೆನದ ಆರಿಗೆನ್ ಕಂತತ್ತಯಾ ! || ಪೊರ್ಲು

ಕಾಡ್‍ದ ಮರಮದೆಟ್ | ತನ್ನಾತೆಗೆ ಬೂರ್ದಿ
ಮುಗುರು ಮಲ್ಲಿಗೆ ಪುರ್ಪ ಈ ಅತ್ತಯಾ ? || ಪೊರ್ಲು ||
ಡರ್ಲೊಂದು ಈ ಕಾತಿನೆಂಕತ್ತಯಾ ? || ಪೊರ್ಲು ||

ಎನ್ನನೇ ನೆನೆತೊಂದು | ಕಣ್ಣೊರ್ಮೆ ನಿಲ್ಕೊಂದು
ತಾದಿ ಕಾತಿನಿ ಅವುಲು ಎನನತ್ತಯಾ | ಪೊಣ್ಣೆ|
ತಾದಿ ಕಾತಿನಿ ಅವುಲು ಎನನತ್ತಯಾ ? ಪೊರ್ಲು ||

 

ಪಂರ್ದ್ ಪೆಲಕಾಯಿ - ಬಡಪತ್ತ್‍ದ ಬದ್‍ಕ್

ಬಡಪತ್ತ್‍ದ ಬದ್‍ಕ್ 

ಬರವುದಾಂತಿನ ಮಂದೆ ಎಂಕುಲು |
ಪಿರವು ಒರಿದಿನ ಜನೊಕುಲು || ಬರವು ದಾಂತಿನ ||

ಮಲ್ಲ ಮನಸ್‍ದ ತೆಲ್ಲ್ ತೆಲಿಕೆದ 
ಎಲ್ಯ ಗುಡ್ಚಿಲ್ ಸೊರ್ಗದಕುಲು
ನೀತಿ ನಿಯತ್‍ದ್ ಬೆನ್ನಿ ಬೆಂದ್‍ದೆ
ಎಂಚನಾ ದಿನ ಕರ್ಪುನಕುಲು || ಬರವುದಾಂತಿನ ||

ಪುಟ್ಟುನೇಡ್ದ್ ಸೈಪುನೇಟ್ಟಲ
ಬಡಪತ್ತಂದವು ಧರ್ಮ ಎಂಕ್ಲೆನ
ದೈವ ದೇವೆರೆನೆಂಕುಲು ದೂರುಜ
ಬೊಡ್ಚಿ ಎಂಕ್‍ಲೆಗ್ ಸುದ್ದಿ ಅಕ್ಲೆನ || ಬರವುದಾಂತಿನ ||

ಭೂಮಿ ಅಪ್ಪೆನ ಪಜೆನ್ ಮಟ್ಟೆಲ್
ಎಂಕುಲು ಐಟೇ ಸುಕೊಟು ನಿದೆರುವ
ಬಾನ ಬೊಳ್ಳಿನ್ ತೂಯಿ ಕಣ್ಣ್‍ಡೆ
ಎಂಕುಲು ಕನೊನು ಕಲಸಿಟ್ಟೆ ಕಟೊನುವ || ಬರವುದಾಂತಿನ ||

ಕಂಡು ತಂಕೊಲು ಎಂಕ್‍ಲೆಗಿಜ್ಜಿ
ಬಂಗ್‍ಲೆ ಕಟ್ಟುನ ತಾಕತಿಜ್ಜಿ
ಬಂಗ ಬತ್ತ್‍ದೆ ಬದ್‍ಕ್‍ದರ್ಥೊನು
ಕಲ್ತ್ ಗೆಂದಿನ ಬದ್‍ಕ್ ಎಂಕ್ಲೆನ || ಬರವುದಾಂತಿನ ||

ಕಾಲಿ ಬಂಜಿಡ್ ಗಾಲಿ ತಿಂದ್‍ದ್ 
ಗೋಳಿ ಮರತ ಬೂರುದಂಚನೆ
ನೇಲೊಂದು ಜೂವ ಒಯ್ತೊಂದು
ಕೂಲಿ ಗಂಜಿದ ತಮ್ಮನದಕುಳು
 || ಬರವುದಾಂತಿನ ||


 

ಪಂರ್ದ್ ಪೆಲಕಾಯಿ - ಕೋರಿಲು ಕೆಲೆಪುಜ

ಕೋರಿಲು ಕೆಲೆಪುಜ

ಮೂಲು ಕೋರಿಲು ಕೆಲೆಪುಜ
ಮೂಲು ಪೆತ್ತೊಲು ಅರೆದುಜ
ಮುಲ್ತ ಮಯಮಯ ಮಯಕ ಬಾನೊಡು
ಬೊಲ್ದು ಪಕ್ಕಿಲು ರಾಪುಜ
ವಿಸನೆ ದಿಂಜಿನ ಮಲಕ ದೊಂಬುಡು
ಮೂಲು  ಪುರ್ಪೊಲು  ಅರ್ಲುಜ .. || ಮೂಲು ||

ಇತ್ತಿ ಜಾಗೆನ್ ಬತ್ತಿ ಕಂಪೆನಿದಕುಲು ಒಯ್ತ್‍ದ್ ಪಾಲ್ ಪಟೊಂಡೆರ್
ಆಳುನರಸೆರ್ ಅಕುಲು ದಕ್‍ದಿನ ಮುಟ್ಟೆ ಪೆಜ್ಜಿದ್ ಬದ್‍ಕ್ ಮಲ್ತೆರ್
ಮಕ್ಕ್ ಜನೊಕುಲು ನಡತಿ ಜಾಗೆಡ್ ಇತ್ತೆ ಪಂತಿಲು ಕೊಡಿಪುಜ
ಮೂಲು ಜೀವೊಲು ಕಲಂಕ್ ನೀರ್‍ಡ್ ಇತೆ ಬಾಜೆಲ್ ಪರ್ಪುಜ .. || ಮೂಲು ||

ಮೂಲು ಬಂಗೊಡು ಬೂರಿನಾಯಗ್ ಬೆರಿಸಕಾಯದ ಕೈಕುಲಿಜ್ಜಿ 
ಸಾಗೊಳಿಗ್ ಮೂಲುಂಡು ಮಾತಲ ಆಂಡ ಭೂಮಿಯೆ ಮುಕುಲೆಗಿಜ್ಜಿಯೆ
ಮೂಲು ವಾಂಟೆಡ್ ಬರ್ಪಿ ಪುಗೆಕ್ ಮಲ್ಲ ಉಸುಲುನು ದೆಪ್ಪೆರಾಪುಜಿ
ಮುಲ್ತ ರಟ್ಟುನ ಬೊಣ್ಯರಾಸಿಡ್ ಸಂಪುಗಾಲಿನ್ ತಿನಿಯೆರಾಪುಜಿ || ಮೂಲು ||

ಪಡಿಲ್ ಬೂರ್ದಿನ ಕಂಡ ಬೈಲ್‍ಡ್ ದಿಕ್ಕ್ ತತ್ತಿನ ಪಕ್ಕಿ ಪರಣೆಲು
ಕೆಪ್ಪು ಮುಪ್ಪುಡು ಪಜ್ಜೆ ಪಾಡುವ ಉಜರ್ ಉಜಡದಲ್ಕೆಕ್ಕಾ ತಿರ್ಗುವ
ಕೋಲ ಜಾತ್ರೆದ ತಾಸೆ ತೆಂಬರೆ ಸೈರನ್‍ದ ಸೊರತೆದುರು ಸೈದ್‍ಂಡ್
ನಮ್ಮ ಪಂಡ್‍ದ್ ಒವುಲ ಒರಿದಿಜಿ ಜೂವ ಪುಡೆರುಂಡು ಅವುಸ ಮುಗಿದಿಜಿ || ಮೂಲು ||

 

ಪಂರ್ದ್ ಪೆಲಕಾಯಿ - ಬೆನ್ಪಿ ನರಮಾನಿ

ಬೆನ್ಪಿ ನರಮಾನಿ

ಓ ಬೆನ್ಪಿ ನರಮಾನಿ | ಈ ಇನಿ ಬೋಡಾಂಡ್
ಮೂಲೊರ ಬತ್ತ್‍ದುಂದೆನ್ ಈ ತೂವೊಡಾಂಡ್ ||

ನಿನ್ನ ಬೆಗರ್‍ಡೆ ಕಟ್ಟಿ ಮಲ್ಲ ಕಾರ್ಖಾನೆ
ಐಕ್ ಪುಣೆಯಿನ ನಿನ್ನ ಕೈಕಾರ್ ಬೇನೆ
ಏರ್ ತೆರಿದೆರ್ ನಿನ್ನ ಬಂಗದಾ ಪೊರ್ತು?
ಏರ್ ಬಯಿದೆರ್ ಮಾಳಿಗೆದಿಲ್ಲಡ್ದ್ ತಿರ್ತ್?
ದೊಂಬುದೆರಿಕ್ ಕರೆಂಚಿನ ನಿನ್ನ ಮೋನೆ
ನಿನ್ನ ಸೇಂಕೆದ ದುನ್ನ ದಿಂಜದಿ ಕೋಣೆ
ನಿದ್ರೆ ಕಜೆರ್‍ದ್ ರಾತ್ರೆ ಉಂತಾದಿನಗರ್
ನರಂಬು ಒಯ್ತ್‍ದ್ ಆನಿ ಮಲ್ತಿನಾ ಸಾರ್ನೆ

ದಡ್ಡ್ ಕಟ್‍ದಿನ ಕೈಟ್ ದೀತಿನಾ ಸಾಲ್ ಕಲ್ಲ್
ಮಾಸ ಕರಪಾಡ್ ತುಂಬಿನಾ ಬಟ್ಟಿ ಮಣ್ಣ್
ನಿನ್ನ ಪುಡದಿನ ಬಿಮ್ಮ ನಿನ್ನ ನುಂಗ್‍ದಿ ಚರ್ಮ
ನಿನ್ನ ಎಕ್ಕ್‍ದಿ ಜೂವ, ಗುರಿ ಬೂರ್ದಿನಾ ಕೆನ್ನಿ
ಬರಂಟ್ ಬಾಯಿಗ್ ನಿನ್ನ ಪಸೆ ಕೊರ್ಜೆರಕುಲು
ಪರಕುಂಟುನೆ ಪಿರ ಪೊರ್ಲುಡೆ ಪೊಲ್ಲುದಿತ್ತ
ಅಕುಲು ಕೊರ್ತಿನ ಕೂಲಿ, ನಿನಡ ರಾತ್ರೆನೆ ಕಾಲಿ
ಕಾಸತ್ತ್ ಅವು ನಿನ್ನ ಮೋನೆಗುಬ್ಬಿನತ್ತ?

ಎಂಚಿ ದೀಪೋಳಿ ನಿಕ್ಕ್ ಏಪ ಮೀಪಿನ ಪರ್ಬ
ದೊಂಬು ಬರ್ಸದ ಗೇನ ನಿಕ್ಕಾಯಿಜತ್ತ?
ಬಲೆಂಕ್ರಿ ಮೈಕೈ ನಿಲಿಕೆ, ಕರಂಟ್‍ದಿನ ತರೆಕುಜಲ್
ತಾರೆದೆಣ್ಣೆಡ್ದ್ ಅಗ್ಗ ಗರ್ವದಣ್ಣೆತ್ತ?
ಕೋರಿಲು ಒಕ್ಕಿಯನಾ ನಿನ್ನ ದಿಕ್ಕೆಲೆನ್ ?
ಕರಿಪತ್ತಂಡಾ ನಿನ್ನಟಿಲ್‍ದಾ ಕರಕುಲು?
ಆಂಡ ಬೂರುನ ಉಂತಿಜಿ ನಿಕ್ಕ್ ಕನೊಕುಲು
ಈ ಜೆತ್ತ ಪನ್ಪಿನಾ ಪನಡ್ ಜನೊಕುಲು

ನನದ ದಿನ ಏತ್ ಪೊರ್ಲು ರಂಗ್‍ದ ಪಂಡ್‍ದ್ 
ಉಲ್ಲೇಸೊಡು ಮೈಯೊರ್ಮೆ ಜಡದೆತ್ತ್‍ದಂಚ್‍ನೆ
ನಿದಿರಿಯೆರೆಗ್‍ಂದ್ ಈ ಆನಿ ಜೆತ್ತ್ತ್‍ದಿತ್ತ
ದಾದಾಂಡ್ ? ಬೊಕ್ಕ ಕುಡ ಲಕ್ಕ್‍ಜತ್ತ?
ಊರುಕಟ್ಟಿನ ನಿಕ್ಕೆ ನಿಲೆದಾಂತೆ ಪೋಂಡು
ಬೆಂದಿ ಬೇಲೆಗೆ ನಿನ್ನ ಬಿಲೆದಾಂತೆ ಪೋಂಡು
ನಾಡ್‍ಕಟ್ಟೆರೆ ಏತ್ ಈ ಆನಿ ಪುಣೆಯ
ದಾಯೆ ಇಂಚ ಈ ಪುಣ ಆದ್‍ಪೋಯ?

ನಿನ್ನ ಬಂಜಿದ ಬಡವು, ನಿನ್ನ ಬಾಲೆದ ಬುಲಿಪು
ಬುಡೆದಿನಾಸೆದ ಕಣ್ಣ್, ಬಿಸಲೆ ಕೇಂಡಿನ ನುಪ್ಪು
ಐಕ್ಕೆತ್ತ ಬೆಂದಿನಿ? ಬೆನ್ಪಿ ನರಮಾನಿ?
ದಾಯೆ ಪನ್ ಲಕ್ಕ್‍ಜ ಮಗ್‍ರ್ ಮನದಾನಿ?
ಈ ಪಾಡ್‍ದಿ ಸಾಪ ಅಕ್‍ಲೆ ಬೆರಿ ಬುಡಂದ್
ಏಪಾಂಡಲೊರ ಬತ್‍ದ್ ಅವೆನೊರಕ್ ತೆರಿಲ
ನಿನ್ನ ಕಾಟೊಡು ಲಕ್ಕಿ ಪುಂಡೆ ಪುಗೆಟ್‍ಕುಲು
ದಂಬು ಕಟ್ಟ್‍ದ್ ಮರ್ಕ ಆಪಿನೆನ್ ತೂಲ..